Poslovne vesti - Makedonija

Фирмите создале додадена вредност од 196,172 милијарди денари

Компаниите во државата во текот на минатата година оствариле вкупен промет од 940,561 милијарди денари, а додадената вредност што ја создале изнесувала 196,172 милијарди денари, објави Државниот завод за статистика.

Вкупниот промет во државата во најголем дел или 41,4% го оствариле трговците на големо и мало, на кои отпаѓаат 44,6 отсто од деловните субјекти и 28% од вработените.

Преработувачка индустрија учествува со 13,3 отсто од претпријатијата, со 30,4 проценти од вработените и создава 26,8 отсто од вкупниот промет.

Во додадената вредност, пак, најголемо учество, со 25%, имале претпријатијата од секторот преработувачка индустрија, а зад нив е трговијата со 23,3%.

Во 2012 г. најголем дел од деловните субјекти или 91,1 отсто биле микро-претпријатија со помалку од 10 вработени, во кои биле ангажирани 33,6 отсто од вкупно вработените. Тие создале четвртина од вкупната додадена вредност. Големите претпријатија се 0,2% од вкупниот број и тие ангажираат 23,3% од вкупно вработените и остваруваат 34,3% од вкупната додадена вредност во рамките на деловниот сектор.

Овие податоци се резултат на анализа на 53.907 деловни субјекти со 334.042 вработени.